Nderohet ish-futbollisti brazilian, Zico
Një statujë e legjendës së Seleçaos vendoset në Muzeun e Dyllit në Rio
Ish-futbollisti i kombëtares braziliane Zico dhe ylli i Flamengos është nderuar me një statujë, e cila tashmë është vendosur në Muzeun e Dyllit në Rio. Ajo përfaqëson futbollistin e shquar i cili kontribuoi në arritjen e Seleçaos në vitet 1980. Ishte vetë ish-futbollisti 71 vjeçar që zbuloi statujën dhe tepër i emocionuar u shpreh: “Emocioni i parë është që jam gjallë dhe kam mundësi të shoh një nderim si ky në shtetin tim, në vendin tim, për periudhën e rëndësishme që kam luajtur në futboll. Unë u jam shumë mirënjohës të gjithë atyre që menduan për këtë”. Arthur Antunes Coimbra i mbiquajtur Zico, vëren se futbolli brazilian nuk është më i njëjti me atë që ai luajti në vitet 1980. “Sot ka një ndryshim të madh me kombëtaren e kohës time me këtë të tanishme. Tani shumica e lojtarëve të grumbulluar luajnë jashtë vendit me klube të mëdha. Në kohën time, kombëtarja braziliane përbëhej nga lojtarë që luanin në Brazil”.
