Ndërtues-banka: Nxitje bashkëpunimit në kontribut të zhvillimit të ekonomisë

Përfaqësues të sistemit bankar dhe atyre që operojnë në sektorin e ndërtimit, diskutuan në një tryezë bashkëbisedimi në ambjentet e hotel Sheraton, për nxitjen e bashkëpunimit biznes-bankë, si faktor që kontribuon në zhvillimin ekonomik të vendit.

Në këtë takim të rëndësishëm të pranishmit u përshëndetën nga Drejtori i Përgjithshëm dhe Anëtar i Bordit Drejtues të BKT, Seyhan Pencabligilsi dhe nga përfaqësuesi i shoqatës së ndërtuesve, Avenir Kika.

Gjatë fjalës së tij Seyhan u shpreh se, “ Mbetemi me besimin që ditët e këqija kanë kaluar dhe ditë më të mira do të vijnë për këtë sektor. BKT ka qenë dhe do të jetë një nga mbështetësit kryesor të sektorit të ndërtimit në vend duke ditur se banka jonë luan një rol mjaft të rëndësishëm në zhvillimet e vendit duke kredituar bizneset dhe duke kontribuar aktivisht në zhvillimin e ekonomisë shqiptare”.

Ndërsa Kika theksoi se, “Aktualisht sektori i ndërtimit është i konsoliduar, ka likuiditet të mjaftueshëm falë mbështetjes konstante të bankave që operojnë në vend”.

Ky takim ishte një mundësi e shkëlqyer për sektorin e ndërtimit për të mbledhur dhe për të ndarë mendimet, si dhe për të diskutuar njëkohësisht çështje kyçe që potencialisht mund të ndikojnë për këtë sektor.