Nis rehabilitimi i varrezave pas zhbllokimit të buxhetit

Më një investim prej 3 milion dollarësh Bashkia e Tiranës ka nisur zbatimin e projektit për sistemimin e varrezave të Tufinës dhe Sharrës.

Zbatimi i projektit nisi pas zhbllokimit nga Gjykata të buxhetit të Bashkisë, i cili u mbajt i bllokuar nga kryeministri Rama për rreth 7 muaj.

Për bashkinë e kryeqytetit, bllokimi i buxhetit solli përveç bllokimit të investimeve dhe bllokimin e shtimit të hapësirës së varrezave në Sharrë dhe Tufinë.

Nënkryetari i Bashkisë Enno Bozdo ka inspektuar sot punimet në varrezat e Tufinës, projekt i cili parashikon rehabilitimin, sistemimin, ndriçimin, gjelbërimin, shtrimin e rrugëve të brendshme rrethimin e jashtëm, ofrimin e sipërfaqeve për shërbimet e fundit, për familjet gjithashtu.

Projektet për të dy varrezat parashikon zgjerimin me një sipërfaqe afër 10 mijë metër katror këtu në Tufinë, dhe 15 mijë metër katror, në Sharrë. Bozdo tha se bllokimi që Edi Rama po i bën projekteve të Bashkisë është në dëm të qytetarëve të Tiranës dhe përmirësimit të cilësisë së tyre të jetës