Nisin votimet në zgjedhjet presidenciale turke
Qendrat e votimit janë hapur në zgjedhjet presidenciale në Turqi. Kryeministri Erdogan shihet si favorit për postin. Erdogani ka thënë se do të ushtrojë pushtet të vërtetë me postin deri tani ceremonial të presidentit.
Turqit kanë nisur të votojnë në zgjedhjet e para të drejtpërdrejta në vend për të zgjedhur presidentin e vendit. Kryeministri Recep Tayyip Erdogan është favorit i qartë për këtë post.
Dy kandidatë e sfidojnë Erdoganin si kandidatë për postin, por të dy janë në sondazhe shumë larg mbështetjes që merr Erdogani.
Sipas sondazheve, kandidati kryesor i opozitës, Ekmeleddin Ihsanoglu do të dalë i dytë në votim. Ihsanoglu përfaqëson kandidatin e përbashkët që bashkon ndarjen politike, partinë e qendrës së majtë, Partinë Republikane të Popullit (CHP) dhe partinë e së djathtës Nationalist Movement Party (MHP).
Ekmeleddin Ihsanoglu duke votuar
Në zgjedhje kandidon edhe kurdi karizmatik 41 vjeçar Selahattin Demirtas, nga partia e qendrës së majtë, Partia Demokratike e Popullit (HDP), të cilin e kanë quajtur edhe “Obaman kurd”.
Erdogani ka thënë se po të zgjidhet, ai do të shërbejë si president që ka më shumë fuqi ekzekutive, duke pretenduar se natyra direkte e votës do ta justifikojë këtë qëndrim. Më parë, presidentin e zgjidhte parlamenti.
Partia në pushtet e Erdoganit, Partia e Drejtësisë dhe e Zhvillimit (AKP) është e vendosur të ndryshojë kushtetutën e vendit.
Aktualisht Turqia është demokraci parlamentare, por me ndryshimet ajo mund të bëhet sistem më presidencial, e ngjashme me atë të Francës.
Erdogani besohet se do të caktojë një kryeministër të përshtatshëm për të që ta ndryshojë sistemin, 60 vjeçari, që është në pushtet që prej vitit 2003, pengohet nga rregullat e partisë që të kandidojë për herë të katërt si kryeministër.
