Nisma e bashkisë së Tiranës, ulet me 50% përdorimi i qeseve plastike

Nismës së bashkisë për reduktimin e qeseve plastike i janë bashkuar edhe 10 markete të tjera.

Nga të dhënat e deritanishme rezulton se përdorimi i qeseve plastike nga qytetarët që blejnë në supermarketet që i janë bashkuar nismës së Bashkisë është ulur me 50 për qind, duke ndikuar ndjeshëm edhe në zvogëlimin e ndotjes në kryeqytet.

Pas suksesit me supermarketet e mëdha, tashmë kjo nismë ka filluar që të shtrihet edhe në minimarketet nëpër lagje të ndryshme të kryeqytetit, duke qenë se i janë bashkuar edhe 10 të tjera, duke e çuar në 21 numrin e marketeve që zbatojnë nismën.

Sipas marrëveshjes së mirëkuptimit midis Bashkisë së Tiranës me marketet, këto të fundit angazhohen që të marrin masat për të ulur deri në ndalimin e plotë të përdorimit të qeseve plastike në pikat e tyre të shitjes.

Për të nxitur qytetarët që të përdorin trastat dhe për t’i dekurajuar në përdorimin e qeseve, ato jepen nga marketet kundrejt një pagese prej 3 dhe 5 lekësh.

Në Tiranë përdoren çdo muaj 100 ton qese, duke shkaktuar në jo pak raste probleme me kanalizimet pas reshjeve të shiut.