OKB zgjeron sanksionet ndaj Koresë së Veriut, reagon Peniani

Testi bërthamor i muajit të kaluar duket se po i kushton shumë Koresë së Veriut, pasi së fundi Organizata e Kombeve të Bashkuara ka vendosur unanimisht sanksione të reja të ashpra ndaj shtetit komunist.

Por, vetëm pak orë nga publikimi i lajmit për zgjerimin e sanksioneve, Peniani ka reaguar duke dashur të tregojë se nuk do të frenojë programi e tij bërthamor. Në orët e parë të së enjtes, Koreja e Veriut ka lëshuar disa predha me rreze të shkurtër në det, njoftoi Ministria e Mbrojtjes së Koresë së Jugut.

Sanksionet e reja të OKB-së janë cilësuar si më të ashprat të vendosura ndonjëherë ndaj Koresë së Veriut. Ato parashikojnë kufizimin e eksporteve dhe inspektimin e të gjitha ngarkesave që hyjnë dhe dalin nga shteti komunist.  Gjithashtu në sanksionet e reja përfshihet edhe bllokimi i aseteve dhe ndalimet e udhëtimeve për 16 individë dhe 12 organizata koreane.

“Sot, bashkësia ndërkombëtare i ka dërguar një mesazh Penianit: Koreja e Veriut duhet të braktisë këto programe të rrezikshme dhe të zgjedhë një rrugë më të mirë për popullin e saj”, tha presidenti amerikan, Obama në një deklaratë.

Ndërsa ambasadorja amerikane në OKB, Samantha Power tha se Koreja e Veriut është më e interesuar në zhvillimin e programeve të tij bërthamore dhe të raketave balistike se sa në përmbushjen e nevojave themelore për qytetarët e saj.