Orlando Bloom viziton refugjatët sirianë
Aktori me famë botërore, Orlando Bloom ka vizituar kampin e refugjatëve në qytetin e Gjevgjelisë, në afërsi të pikës kufitare që lidh Maqedoninë me Greqinë.
Si ambasador i vullnetit të mirë pranë organizatës humanitare “UNICEF”, ai ka biseduar me refugjatët që vijnë nga Lindja e Mesme dhe është interesuar për vështirësitë e tyre gjatë rrugëtimit që bëjnë, problemet në vendlindje, si dhe për synimet e refugjatëve.
Ylli i Hollivudit nuk është prononcuar për mediat në Maqedoni. Ai, vizitën e tij të paparalajmëruar e kishte rezervuar vetëm për emigrantët dhe aktivistët e organizatave humanitare, që i ndihmojnë ata.
Gjatë qëndrimit në Gjevgjeli, Bloom pa nga afër nisjen e trenave specialë, që transportojnë refugjatët nëpër Maqedoni, nga pika kufitare me Greqinë drejt Serbisë.
Gjatë rrugëtimit të tyre drejt vendeve të Bashkimit Europian, mijëra emigrantë nga Lindja e Mesme kalojnë çdo ditë nëpër Maqedoni. Të hënën, nëpër këtë vend kanë kaluar rreth 1000 refugjatë, prej të cilëve 460 kanë qenë fëmijë.
