Pagesa e energjisë, Rama: Rikthehet në formën e investimeve

E cilësuar si zona informale në Tiranë, trekëndëshi Paskuqan-Babrru-Bathore është kthyer në shembullim e formalizimit përsa i përket sektorit të energjisë elektrike, duke shënuar një rritje të ndjeshme të arkëtimeve në masën 116 për qind.

Rreth 11 mijë banorë të këtyre zonave lidhën aktmarrëveshje me OSHE dhe ky fakt po u kthehet në formën e investimeve me ndërtimin e rrjetit të ri 20 KV dhe atij të tensionit të ulët me linjat ABC.

Vetë kryeministri Edi Rama inspektoi ecurinë e punimeve në terren, duke thënë se ky është një shembull konkret që investimet e banorëve nuk shkojnë në drejtim të paditur dhe se në të njëjtën formë do t’u kthehet të gjitha zonave në Shqipëri.

“Gjithë ky volum i madh investimesh që nuk janë bërë ndonjëherë në një rrjet shpërndarjeje të amortizuar, që në 80% të vendit është mbi 40 vjeç, nuk është as më shumë e as më pak kontribut i qytetarëve dhe familjeve që i dhanë mundësi ringritjes së shtetit dhe rivendosjes së rendit ligjor në këtë sektor, duke i dhënë fund një epoke të turpshme, një njolle të zezë në fytyrën e vendit tonë dhe për të kontribuar për të mbuluar një gropë të madhe, të trashëguar nga e shkuara”, deklaroi Rama.

Në këtë zonë infrastruktura elektrike paraqitet si më problematikja dhe ky investim me vlerë 1.7 miliard lekë do të përmirësojë ndjeshëm furnizimin me energji për 80 mijë banorë të saj.

Sipas drejtorit të OSHEE, Ardian Çela, kjo ndërhyrje përfshin ndërtimin e 180 kabinave, montimin e 3.500 shtyllave elektrike dhe 6 fiderat e rinj.

“70% e investimit do të hyjë në efiçencë brenda viti të ri, ndërsa pjesa tjetër brenda fundit të marsit. Preken 20 mijë abonentë, rreth 80 mijë banorë, ku do të ketë 200 kilometra kabull ABC ajror dhe 180 kilometër kabull 20 KV linjë nëntokësore. Kjo do të kthehet në një zonë model”, tha Çela.

E mira e këtij investimi konsiston në pamundësinë e vjedhjes së tij përmes lidhjeve të dyfishta, falë linjave ABC dhe si pasojë uljen e humbjeve në rrjet deri në 8%, nga 45 për qind që janë aktualisht.