Pallatet te diga, Veliaj fton qytetarët para Apelit Administrativ

Në një dalje para medieve pasditen e së martës, vetëm pak orë pasi është marrë një vendim gjykate për çështjen e ndërtimit të pallateve te diga e Liqenit të Tiranës, kryebashkiaku Erion Veliaj e ka quajtur atë si skandaloz dhe të paprecedentë, ndërkohë që ka ftuar qytetarët, që të mërkurën në orën 11 të jenë sa më të shumtë përpara Gjykatës së Apelit Administrativ.
Duke e quajtur një Gjyqësor të rënë, për shkak se një gjykatëse – siç tha ai, – ka rrëzuar në fshehtësi kërkesën e Bashkisë së Tiranës për ndryshimin e trupës gjykuese si pasojë e konfliktit të interesit, ai pret që edhe vendimi i nesërm i Apelit Administrativ të jetë i padrejtë dhe në favor të ndërtimit të 5 pallateve mbi digën e liqenit, leja e ndërtimit të të cilave është në kundërshtim me ligjin, e për këtë bën fajtorë presidentin Nishani, ish-kryeministrin Berisha dhe kreun aktual të PD-së, Lulzim Basha, paraardhës i tij në Bashkinë e Tiranës.