Papa mund të japë dorëheqje

Në përvjetorin e dytë të zgjedhjes së tij në krye të Kishës Katolike, Papa Françesku, në një intervistë për një televizion meksikan, la të kuptohet se ai mund të japë dorëheqjen sikurse paraardhësi i tij.

“Unë kam ndjesinë se papati im do të jetë i shkurtër, katër ose pesë vjet. Nuk e di, ndoshta edhe dy ose tre vjet”, ka thënë Papa Françesku.

Ai e vlerësoi si të “guximshëm” vendimin e Papa Benediktit për të dhënë dorëheqje nga drejtimi i Kishës Katolike në vitin 2013.

Papa Françesku edhe në të kaluarën nuk e ka mohuar mundësinë e largimit nga drejtimi i kishës, por është shprehur kundër idesë për vendosjen e një kufiri moshe për udhëheqësin e Kishës Katolike.