Parlamenti bën betimin, diskutohet programi i qeverisë

Procedura e betimit të parlamentit të ri grek filloi me meshën e kryepeshkopit Jeronimos, ndërkohë që njëri prej deputetëve myslimanë, Zeibek Husein (SYRIZA), u betua para Kur’anit, ndërsa dy deputetë të tjerë të maxhorancës, Mustafa Mustafa dhe Aihan Karajosuf, bënë betim politik.

Këtë herë deputetët që nuk dëshironin të bënin betimin fetar kishin mundësinë të betohen “për nderin dhe ndërgjegjen e tyre”.

Nga procedura e betimit mungonte ministri i Financave, Janis Varufaqis, i cili ndodhet jashtë shtetit.

Përbërja e Parlamentit të ri ka 149 deputetë të SYRIZA-s, 13 të Grekëve të Pavarur (ANEL), 76 të ”Demokracisë së re”, 17 të ”Agimit të Artë”, 17 të Lumit, 15 të Partisë Komuniste dhe 13 të PASOK-ut.

Të shtunën parlamenti do të diskutojë për programin katërvjeçar të qeverisë së koalicionit mes SYRIZA-s dhe Grekëve të Pavarur.