Parlamenti Evropian kritika kundër Ciprasit pas kërkesës për dëmshpërblime lufte

Kryeministri grek, Aleksis Cipras u kritikua sot nga grupime politike të Parlamentit Evropian për shkak të kërkesës së tij për dëmshpërblim lufte nga Gjermania për të mbuluar një pjesë të borxhit.

“Kjo është e kundërta e asaj që duhet bërë”, theksoi shefi i grupit socialist, Gianni Pittella duke shprehur keqardhje për një rikthim të egoizmit kombëtar.

“Kjo nuk është mënyra më e mirë për ecurinë e debatit”, theksoi bashkëpresidenti i të Gjelbërve , Philippe Lamberts.

Në negociatat që Greqia ka ndërmarrë me partnerët për t’u çliruar nga kthetrat e masave shtrënguese dhe për të gjetur një zgjidhje për problemin e borxhit, Berlini do të jetë çelësi për zgjidhjen e krizës dhe duhen bërë kompromise. Një pretendim i tillë nuk do të ndihmonte në qetësimin e debatit.

“Gjuha nuk është e përshtatshme”, theksoi presidenti i Aleancës së liberal-demokratëve, belgu Guy Verhofstadt duke shtuar se Greqia ka nevojë për reforma strukturore. Por në këtë pikë nuk jemi askund.

“Marrëveshjet e kaluara duhet të respektohen dhe këtë Cipras duhet ta mësojë”, theksoi gjermani, Manfred Weber, presidenti i grupit të Partisë Popullore Evropiane.

Aleksis Cipras deklaroi të dielën se Greqia kishte një detyrim historik dhe moral për të kërkuar dëmshpërblime lufte dhe rimbursimin e një kredie të dhënë për nazistët gjatë Luftës së Dytë Botëror.

Shuma nga dëmshpërblimet e mundshme të kërkuara mund të arrijë në 162 miliardë euro, pothuajse sa gjysma e borxit të vendit, sipas shifrave që qarkullojnë në Athinë.