Parlamenti Evropian voton më 14 shkurt rezolutën për Shqipërinë

Parlamenti Evropian vendosi zyrtarisht të votojë më 14 shkurt rezolutën për Shqipërinë, bazuar në raportin e përgatitur nga eurodeputeti Knut Fleckenstein dhe të miratuar në Komisionin e Jashtëm.

Votimi i raportit dhe rezolutës vjen vetëm 5 muaj para zgjedhjeve parlamentare të 18 qershorit, të cilat bashkë me zbatimin e reformës në drejtësi shihen si kusht për integrimin evropian.

Komisioni i Jashtëm i PE-së miratoi më 31 janar draft-rezolutën për Shqipërinë.

Në dokument vlerësohej progresi i vazhdueshëm mbi reformat që lidhen me BE-në, në veçanti për ndryshimet kushtetuese që i hapin rrugën reformës së thellë e tërësore në sistemin e drejtësisë.

Megjithatë, “Shqipëria nevojitet të zbatojë në mënyrë të besueshme reformat që lidhen me BE-në dhe të sigurojë që zgjedhjet parlamentare të qershorit të jenë të lira e të ndershme, nëse duhet të nisë negociatat e anëtarësimit në BE”, citohet në projektrezolutë.