Deputetja e Partisë Demokratike, Albana Vokshi, deklaroi dje nga selia e PD se, “Partia Demokratike ka përgatitur kallëzimin penal për Erion Veliajn për shkelje të rënda ligjore në lidhje me tenderin fiktiv të rrugës ‘John Belushi’ në njësinë administrative nr.4 në Tiranë”.
Vokshi u shpreh se, “tenderi i shpallur nga bashkia në datën 19 dhjetor parashikonte si afat për dorëzimin e dokumentacionit të kompanive të interesuara për këtë tender datën 9 janar, si dhe shpalljen e kompanisë fituese të këtij tenderi në datë 22 janar. Projekti sipas studimit që është miratuar nga vetë bashkia do të zgjaste rreth 5 muaj, pra fiks deri në periudhën e zgjedhjeve të 14 majit”.
Por, vijoi ajo, “Erion Veliaj urdhëroi nisjen e punimeve, si gjithnjë fshehurazi, natën, pa tabela, pa projekt, pa një plan, sigurisht dhe pa standarde, por ajo që është më e rënda, në shkelje ligjore, në shkelje të çdo procedure të parashikuar në legjislacionin aktual”.
Vokshi nënvizoi se, kjo është “qartazi një tender fiktiv, dhe një vjedhje e taksave të qytetarëve shqiptarë”.
“Pas analizës juridike, pas vënies në dispozicion të të gjitha provave filmike, fotografike, etj., ajo që i kemi kërkuar SPAK-ut është regjistrimi dhe fillimi i procedimit penal ndaj Erion Veliajt, si edhe personave të tjerë, të identifikuar, apo jo. Si edhe, kryerjen e të gjitha veprimeve hetimore të nevojshme për sqarimin e saktë e më të plotë të rrethanave të parashikuara më sipër, si edhe paraqitjen e kërkesës për urdhërimin e vendosjes së sekuestros preventive mbi dokumentacionin e këtij tenderi”, tha Vokshi.
Pamela Anderson e Partise Demokratike eshte ne mission shpetimi ne Baywatch Albania