PD, Zeneli: Rendi është në pikë kritike

Për Partinë Demokratike, rendi dhe siguria në vend ndodhet në një pikë kritika dhe ministri Saimir Tahiri, në krye të Ministrisë së Brendshme e ka humbur legjitimitetin.

“Një ministër i provuar tashmë me fakte e prova si i lidhur me bandat e narkotikëve. Saimir Tahiri është një nxitje për krimin, një nxitje për trafikun e drogës. Me Saimir Tahirin janë krijuar grupet e paprekshme që kanë imunitet që sundojnë në zona të caktuara e në qytete të caktuara”, deklaroi në një dalje për mediat, deputeti demokrat, Alban Zeneli.

Opozita këmbëngul në dëshminë e ish-oficerit të lartë të antidrogës, Zagani.

“Edhe pse doli publikisht lidhja e tij me bandën e Habilajve, fakti që u jepte makinën personale me të cilën kryheshin punët e pista, të njëjtën makinë që më pas e merrte Saimiri për të kaluar pushimet, sërish ky i inkriminuar vazhdon të jetë në krye të rendit. Dhe kur një i inkriminuar është në krye të rendit, sigurisht se rend nuk ka, siguri nuk ka më. Krimi ka njeriun e tij në detyrë, krimi ka gjetur ministrin e duhur, ndaj shtohet e zgjeron terren”, shtoi Zeneli.

Në gjykimin e Partisë Demokratike largimi dhe hetimi i tij është i Saimir Tahiri është një emergjencë dhe kusht për rivendosjen e rendit në vend.