Përshëndetja naziste e Mbretëreshës, reagon Pallati Mbretëror
Pallati Mbretëror përmes një deklarate u shpreh i zhgënjyer me publikimin e disa fotove, të një filmi të vitit 1933, ku shihet Mbretëresha, atëherë 7-vjeçare, duke bërë përshëndetjen naziste.
Fotot e publikuara nga “The Sun”, tregojnë Edwardin e VIII që mëson Elizabetën, të ëmën dhe motrën e saj si të bëjnë përshëndetjen e famshme naziste.
Pallati Mbretëror ka thënë se është për keqardhje se si një lojë familjare, që ka ndodhur para tetë dekadash, iu paraqitet njerëzve sot, të cilët tashmë e dinë se nazizmi përfaqëson një periudhë të errët.
“Është zhgënjyese të kuptosh që video publikohet tani. Në atë kohë, ajo ka qenë një lojë familjare, askush nuk e dinte se çfarë na priste në vazhdim”, thuhet në deklaratë.
Video bardhezi që zgjat 17 sekonda mendohet të jetë bërë në vitet 1933-34, vetëm disa vite përpara se të shpërthente Lufta e Dytë Botërore.
