Prokuroria fshikullon gjykatat dhe gjykatësit për Ben “Qimen” dhe Arben Gropën

Prokuroria e Përgjithshme, i është drejtuar me një kërkesë Këshillit të Lartë të Drejtësisë dhe Ministrisë së Drejtësisë që të verifikojë procedurat e vendimeve gjyqësore të marra në ngarkim të Arben Isufaj, biznesmeni i njohur fierak, i njohur ndryshe si Ben “Qimja”, caktimin e masës së sigurisë për Arben Gropën, i cili rezulton i arratisur nga masa e arrestit të shtëpisë si dhe për çështjen e lirimit të shtetasit Erjon Sadikaj.

Prokuroria ngre zërin kundër gjykatave dhe gjykatësve, duke deklaruar se vendimet e marra për këta persona, jo vetëm janë tërësisht të pabazuar në ligj e në prova, por edhe kanë cenuar besueshmërinë dhe reciprocitetin e institucioneve shqiptare me shtetet e huaja veçanërisht ato të BE.

“Prokuroria e Përgjithshme kërkon nga KLD dhe Ministria e Drejtësisë të vlerësojë procedurën që është ndjekur për vendim marrjen e gjyqtarëve në disa gjykata të ndryshme të Shqipërisë, të cilat në gjykimin tonë janë  pa baza, në prova dhe ligj. Për prokurorinë e Përgjithshme, gjykata, përmes këtyre vendimeve ka lejuar shkeljen e ligjit, duke sjellë pasoja të pariparueshme në vlerësimin e organit të prokurorisë këto vendime përbëjnë dhe cenim të marrëdhënieve të besimit të mirë dhe reciprocitetit të institucioneve shqiptare me shtetet e huaja veçanërisht ato të BE.”  thuhet në Deklaratën e Prokurorisë së Përgjithshme të lexuar sot në një deklaratë për shtyp nga Drejtorja e Kabinetit e Prokurorit të Përgjithshëm, Fjorida Ballauri.