Prokuroria për Krime të Rënda kërkon konfiskim të pasurisë të një biznesmeni

Prokuroria për Krime të Rënda kërkon nga gjykata konfiskimin e llogarive bankare në shumat totale 3.2 milionë dollarë dhe 450.000 euro, të shtetasit Kastriot Ismailaj, administrator i shoqërisë “A….. D….Corporation LTD”, bazuar në ligjin “Për parandalimin dhe goditjen e krimit të organizuar e trafikimit nëpërmjet masave parandaluese kundër pasurisë”.

Prokuroria për Krime të Rënda, e cila është struktura përgjegjëse për zbatimin e këtij ligji, ka regjistruar procedimin penal në bazë të akteve të përcjella nga Prokuroria e Tiranës, e cila po zhvillon hetime ndaj këtij shtetasi për veprën penale të “Mashtrimit”.

Fillimisht, ndaj llogarive bankare të këtij shtetasi, me kërkesë të Prokurorisë, gjykata ka vendosur masën e sekuestros preventive (paraprake). Shtetasi Ismailaj, i ardhur në dijeni të vendosur së sekuestros, nuk ka paraqitur asnjë dokument për provuar ligjshmërinë e burimit të krijimit të pasurive.