Propaganda, ISIS hap televizionin e vet, 24 orë informacion

Organizata terroriste “Shteti Islamik” hap televizionin e saj online, me informacione gjatë 24 orëve.

Edhe gazetari britanik John Cantlie, i burgosur i Kalifatit, do të prezantohet në të me shfaqjen e tij të njohur si “Koha për të rekrutuar”, të cilën ka nisur ta shfaqë tashmë.

Në rrjetet sociale, njerëzit e lidhur me ISIS kanë filluar të shpërndajnë videon, që i bën reklamë televizionit të quajtur “Kanali i Kalifatit Islamik”.

ISIS tashmë zotëron një radio, që ndodhet në Mosul, e qaujtur “Al-Bayan si dhe një stacion televizi satelitor të quajtur Tawheed në Libi, por kanali i ri synon rritjen e teleshikuesve në rang ndërkombëtar dhe do të përbëjë një hap më shumë të propagandës së kësaj organizate.

Që nga viti i kaluar, John Cantlie, gazetari i rrëmbyer në Siri është shfaqur në video të shumta në të cilat ai komenton në mënyrë kritike, politikën perëndimore në drejtim të “Shtetit islamik” dhe Lindjes së Mesme në përgjithësi.