Rama: Çfarë emocioni, flamuri shqiptar mbi avionin e Papës
Bashkëjetesa paqësore mes besimeve fetare në Shqipëri është një shenjë e admirueshme për botën, deklaroi sot papa Françesku në përshëndetjen për gazetarët, ndërkohë që ishte në fluturim e sipër nga Roma për në Tiranë.
“Shqipëria është një vend që ka vuajtur shumë”, nënvizoi papa.
”Sidoqoftë, ajo arriti të gjejë paqen përmes besimeve të ndryshme. Dhe kjo është një shenjë e admirueshme për botën, për paqen dhe ekuilibrin në favor të qeverisjes”, theksoi papa Françesku
“Çfare emocioni flamuri shqiptar mbi avionin e Papes dhe zbritja e Atit te Shenjte mbi token e shqiptareve”, shkruan Kryeministri Edi Rama në rrjetin social Twitter.
Papa Françesku mbërriti në Aeroportin “Nënë Tereza” në orën 08.55 minuta. Ai u prit nga kryeministri Edi Rama, ministri i jashtëm Ditmir Bushati, ministrja e Kulturës Mirela Kumbaro si përfaqësues të Kishës Katolike .Papa Françesku zhvilloi një takim me Kryeministrin Edi Rama në sallën VIP të Aeroportit Ndërkombëtar “Nënë Tereza”. Takim zgjati pak minuta. Kryeministri Rama i dhuroi Atit të Shenjtë një kupë nga dheu shqiptarë, të cilën e publikoi një ditë më parë.
