Rama: Ja kush u qan hallin studentëve

Kryeministri Edi Rama ka postuar mbrëmjen e së martës një set fotografik në rrjetin social “Facebook”, ku tregohen disa dosje të Universiteteve që u është hequr liçenca, të cilat ruheshin në kushte mjaft të këqija.

Duke iu referuar deputetëve të Partisë Demokratike, Kryeministri Rama thekson se ata shkatërruan, sistemin arsimor në vend.

“Shihini vetë se çfarë quanin dosje universitetesh delenxhinjtë e pushtetit që rrënoi, bashkë me krejt Shqipërinë, edhe sistemin tonë arsimor dhe që sot dalin përditë në foltoren e SHQUP-it kundër shkuljes së piramidave në arsim!”, shkruan Kryeministri Rama.

Ndërsa kreu i qeverisë thekson se vetëm 300 ditë u deshën që të bëhej kontrolli i munguar në 20 vjet dhe të sistemohej i gjithë dokumentacioni.

“300 ditë na u deshën të bëjmë kontrollin e munguar në 20 vjet dhe të sistemojmë gjithë dokumentacionin e shpartalluar nën pushtetin e viteve 2005-2013 që përkojnë me abuzimin më të madh me arsimin në historinë e shtetit shqiptar #VajmedetPD”, shkruan Kryeministri Edi Rama.