Rama në tryezën e BB: Reforma në arsim, nevojë për financim. Akreditues të huaj për universitetet

Kryeministri i vendit, Edi Rama e ka vlerësuar reformë në arsim si më të rëndësishmen dhe më emergjenten si dhe ka kërkuar bashkëpunimin dhe mbështetjen e bankës botërore për financimin e kësaj reforme, në kushtet kur sipas tij gjendja e arsimit është lënë në mjerim për shumë kohë.

Deklaratat e kryeministrit u bënë gjatë konferencës së nivelit të lartë mbi politikat në reformën e arsimit të zhvilluar sot në Tiranë, me praninë edhe të ministres së Arsimit dhe Sportit Lindita Nikolla dhe Drejtorja Rajonale e Bankës Botërore, Ellen Goldstein.

“Mbështetja e BB-së është jashtëzakonisht e rëndësishme se nga njëra anë, asistenca e ofruar na ka dhënë mundësinë të shprehim gjërat saktë, nga ana tjetër mbetet domosdoshmëri sigurimi i burimeve financiare për të vendosur standardet në realitet”, tha kryeministri Rama.

Duke u ndalur te reforma në arsimin e lartë, kreu i qeverisë theksoi se mbyllja e disa universiteteve private që funksionin jashtë çdo kriteri ishte vetëm hapi i parë i reformës që do të pasojë me akreditimin e tyre sipas cilësisë nga akreditues te huaj.

“Reforma në arsimin e lartë u bë për të ndalur hemorragjinë e arsimit të lartë që bashkëjetoi për vite duke përmbytur një pafundësi ëndrrash të të rinjve. Nuk do ketë më të rinj me diploma që nuk gjejnë dot një punë”, – tha Rama.