Raporti i “AI”: Humaniteti ka vdekur
“Humaniteti ka vdekur”. “Amnesty International” citon fjalët e një shtetase jemenete pas bombardimit të një shkolle për të përshkruar situatën pesimiste në botë sa i përket të drejtave të njeriut.
Sipas raportit vjetor, ka shumë pak shpresë që bota të bëhet më e mirë dhe më paqësore. Lufta, dhuna dhe përndjekje po bëhen përditshmëri në shumë kontinente dhe po detyrojnë çdo ditë me mijëra vetë të marrin arratinë.
“2015-ta është ndoshta njëra nga vitet më të tmerrshme që më kujtohen”, thotë Sekretari i Përgjithshëm i qendrës së “Amnesty International” në Londër, Salil Shetty në një intervistë për “DË”.
“Sistemi që ka ngritur për 70 vjet bashkësia ndërkombëtare për të mbrojtur të drejtat e njeriut është i rrezikuar pasi nuk ka rajon në botë që mbetet pa përmendur”, thotë ai.
“AI” denoncon përndjekjen e aktivistëve të të drejtave të njeriut, zhdukjen e tyre të papritur në Amerikën Latine, në Azi dhe Afrikë, por edhe ekzekutimet në SHBA dhe Azi. Luftërat dhe gjakderdhjen e tmerrshme në Lindjen e Mesme dhe luftërat civile në Afrikë që kanë detyruar miliona vetë të arratisen.
Raporti i “AI” e paraqet si katastrofike situatën globale të refugjatëve duke thënë se pavarësisht se të drejtat e tyre janë të specifikuara qartë në deklaratën e përgjithshme të të drejtave të njeriut “de facto” nuk gëzojnë asnjë të drejtë.
As Europa, as Bashkimi Europian nuk bëjnë figurë të mirë në këtë raport. “Në vend që të krijohen rrugë të ligjshme dhe të sigurta, dhe sidomos të ndihmohen ashtu siç duhet, BE bën të kundërtën, pra vazhdon me politikën e izolimit dhe do të vazhdojë të ashpërsojë masat në kufi për të mos lejuar refugjatët të hyjnë në Europë”, thotë Selmin Caliskan.
