Refugjatët, ftesa e Tusk: Bisedime për mbylljen e itinerarit ballkanik

Shumica e takimeve europiane për krizën kanë prodhuar rezultat në letër, por jo dhe aq në terren. Megjithatë, Donald Tusk është optimist në gjetjen e një konsensusi mbi krizën e refugjatëve në samitin e kësaj të hëne, BE-Turqi, në Bruksel.

Presidenti i Këshillit Europian u angazhua maksimalisht, që ky event të rezultojë në një strategji gjithëpërfshirëse, e cila të ndihmojë në uljen e fluksit të emigrantëve, e për këtë arsye zhvilloi ditët e fundit një tur diplomatik në kryeqytetet përgjatë itinerarit ballkanik.

Tusk vizitoi Austrinë, Slloveninë, Kroacinë, Maqedoninë, Greqinë dhe Turqinë. Të premten ishte edhe në Serbi. Qeveritë e të gjitha këtyre vendeve janë të mendimit se, refugjatët nuk duhen lejuar të kalojnë më tranzit drejt Gjermanisë apo shteteve skandinave, thuhet në ftesën e tij për samitin e së hënës.

“Me këtë mbyllet itinerari ballkanik”, të cilin e përshkuan vitin e kaluar qindra mijëra refugjatë, për të hyrë në vendet e BE-së. Zyrtari i lartë përforcon në të njëjtën kohë qëndrimin e tij se, Europa duhet të kthehet te qarkullimi i lirë i “Schengen”-it.

Vëmendja po përqëndrohet tani te bashkëpunimi me Ankaranë, nga e cila pritet ndihmë në uljen e numrit të refugjatëve të rinj që hyjnë në Greqi. Si shpërblim janë planifikuar ndihma miliarda euroshe dhe liberalizimi i vizave për Turqinë, që duhet të pranojë mes të tjerash shumë më tepër emigrantë të kthyer mbrapsht, të cilët nuk gëzojnë të drejtën e mbrojtjes ndërkombëtare.