Rrëshqitje dheu në aksin Tiranë-Elbasan,bllokohet qarkullimi
Reshjet e shiut të ditëve të fundit kanë provokuar rrëshqitje dheu në aksin nacional Tiranë-Elbasan, duke bllokuar lëvizjen e makinave. Erozioni i tokës ka ndodhur në fshatin Ibë, pranë vendit ku po bëhen punime për autostradën e re.
Si pasojë e kësaj janë shkaktuar dëme materiale, ku një lokal dhe shtylla e tensionit të lartë janë shembur prej rrëshqitjeve të dheut, ndërkohë që rrezikohen edhe disa banesa aty pranë. Erozioni i tokës ka nisur në orën 03:00 të mëngjesit të sotëm dhe vazhdon që të jetë aktiv.
Për të normalizuar qarkullimin, në vendin e ngjarjes kanë shkuar mjetet e tonazhit të rëndë për të larguar masivin e dheut. Policia e Qarkullimit Rrugor u bën apel drejtuesve të mjeteve që gjatë paradites së sotme të shmangin aksin Tiranë-Elbasan, duke shfrytëzuar qytetin e Durrësit.
