Sarandë, ushtronin prostitucion kundrejt 3 mijë lekëve; në pranga 4 persona

Goditet një rast i ushtrimit të prostitucionit në qytetin e Sarandës, në kuadër të operacionit të koduar “Ladies”, ku si rezultat i këtij aksioni janë arrestuar 4 persona. Në pranga kanë rënë shtetasit B.M., 27 vjeç, banues në Tiranë; G.B., 32 vjeç, banues në Tiranë; A.I., 37 vjeçe, banuese në Sarandë , e cila ushtronte prostitucion dhe D.B., 25 vjeçe, banuese në Berat ku edhe kjo ushtronte prostitucion.

Hetimet në lidhje me këtë operacioni kishin nisur përpara disa muajsh dhe pasditen e djeshme, rreth orës 15:20, në lagjen nr.1 Sarandë, janë kapur në flagrancë nga policia 4 shtetasit e mësipërm, duke ushtruar prostitucion në një banesë të përshtatur posaçërisht për kryerjen e kësaj veprimtarie.

Nga hetimet e kryera, dy shtetaset femra dyshohet se e ushtronin veprën penale të prostitucionit kundrejt pagesës 3000 lekë të rinj. Vijojnë hetimet për zbulimin e personave të tjerë të implikuar në këtë veprimtari. Materialet iu referuan Prokurorisë për veprën penale “Ushtrimi i Prostitucionit”.