Serbia nuk ngopet me Asociacionin

Qeveria e Serbisë është duke u përgatitur që përmes një dokumenti të kërkojë kompetenca shtesë për Asociacionin e Komunave Serbe në veri. Por, zyrtarë të Qeverisë kosovare zotohen se nuk do të ketë asgjë më shumë sesa ajo që parashihet me Ligjin për qeverisje.

Burime të afërta me procesin e bisedimeve në Bruksel i kanë thënë gazetës së Serbia është duke u përgatitur të parashtrojë kërkesa shtesë në Bruksel, për sa i përket Asociacionit të Komunave Serbe në veri.

“Kemi informacione se pala serbe e ka hartuar një dokument, përmes të cilit pretendon të kërkojë kompetenca shtesë për Asociacionin, përtej Ligjit për Qeverisje Lokale. Këtë dokument Serbia po pret ta diskutojë me Prishtinën zyrtare sapo të krijohen institucionet e reja të Kosovës. Sipas këtij dokumenti, Beogradi ka parashikuar që në Asociacionin e Komunave Serbe të përfshihen të gjitha komunat me shumicë serbe në Kosovë”, ka bërë të ditur ky burim i gazetës.

Pavarësisht pretendimeve të Beogradit që Asociacioni i Komunave Serbe të ketë kompetenca shtesë, zyrtarë të Qeverisë së Kosovës zotohen se nuk do të ketë asgjë më shumë sesa ajo që parashihet me Ligjin për Qeverisje Lokale.

“Kjo çështje edhe më herët është folur në Bruksel, por edhe serbët e kanë bërë një pajtim që në kuadër të ligjeve të Republikës së Kosovës t’i realizojnë të drejtat e tyre. Ndërsa, ne si ministri e kemi Ligjin për Qeverisje Lokale dhe krejt çka është në kuadër të këtij ligji serbët do ta gëzojnë, çka është jashtë atij ligji natyrisht se nuk mund të pajtohemi dhe nuk mund të bëhet. Këto janë supozime, nëse eventualisht mund të ketë kompetenca shtesë, atëherë mund të konsiderohen komuna që nuk janë në kuadër të Qeverisë së Kosovës dhe në asnjë mënyrë nuk mund të ketë kompetenca shtesë, përveç atyre që janë të parapara me ligj”, ka thënë për “Kosova Sot” zëvendësministrit i Pushtetit Lokal në detyrë, Basri Musmurati.