Shqipëria do të ketë edhe një operator të katërt të shërbimeve 3G

Autoriteti i Komunikimeve Elektronike dhe Postare (AKEP) ka hapur sot ofertat lidhur me tenderin tenderin publik të shpallur në 23 korrik me objekt: “Dhënia e të drejtave të përdorimit në brezin e frekuencave 1965 – 1980 MHz çiftuar me 2155- 2170 MHz dhe 5 MHz spektër i paçiftuar 1915 – 1920 MHz”. Referuar ofertave të paraqitura këtë të hënë, Shqipëria do të ketë edhe një operator të katërt të shërbimeve 3G. Në hapjen e ofertave që u bë sot nga AKEP, “Plus” ofroi rreth 2.97 milionë euro për dy nga katër brezat në garë.
Për brezin e tretë të lirë “Vodafone Albania” ofroi 1.552 milionë euro, ndërsa “AMC” 1.55 milionë euro. Ndërsa për brezin e fundit, që kishte një gjerësi shumë të kufizuar të spektrit, nuk pati oferta. Sipas vlerës së ofertave, pritet që “Plus” të marrë të drejtë përdorimi në frekuenca që mundësojnë shërbime 3G, ndërsa edhe “Vodafone Albania” do të marrë një frekuencë shtesë.
Komisioni i Vlerësimit të Ofertave pritet të bëjë renditjen zyrtare në fund të kësaj jave, ndërsa fituesit do të shpallen me vendim të Bordit Drejtues të AKEP. Nëse procesi i vlerësimit të ofertave nuk do të ketë ankimime, ofrimi i shërbimeve në brezat e rinj pritet të nisë në fillim të vitit të ardhshëm. Deri tani, shërbimet 3G ofrohen nga tre operatorë dhe sipas të dhënave më të fundit të AKEP përdoren nga 1.2 milionë shqiptarë. Nga tre licencat e para, shteti ka arkëtuar gjithsej rreth 52 milionë euro