Situatë e qetë në veri, qarkullimi drejt Jarinjës vazhdon normalisht
Qarkullimi nga qyteti i Mitrovicës e deri në pikën kufitare në Jarinjë po vazhdon normalisht pas zhvillimeve të fundit në veri të vendit, megjithëse lëvizjet e veturave janë të pakta.
Ekipi i RTK-së, i cili ka lëvizur nga Mitrovica deri në pikën kufitare në Jarinjë nuk ka vërejtur prezencë të policisë e as të KFOR-it. Situata duket e qetë, teksa lëvizjet e veturave janë të pakta.
Ndërsa, jo zyrtarisht RTK ka mësuar se vetëm gjatë ditës së sotme janë shqiptuar 40 fletë-qortime për pronarët e veturave me targat ilegale. Vendosja e tiketave ngjitëse në targa për automjetet që vijnë nga Serbia po vazhdon të zbatohet si zakonisht.
Ndërkohë, edhe gjatë ditës së sotme kanë vazhduar dorëheqjet e zyrtarëve serb, të cilët mbanin pozita në institucionet e Kosovës, pas suspendimit të drejtorit rajonal të Policisë së Kosovës në veri, Nenad Gjuriq. Ky i fundit refuzoi të zbatonte vendimin e ekzekutivit për lëshimin e fletë-qortimeve nga 1 nëntori për bartësit e automjeteve me targa ilegale në veri të vendit.
