Spiropali: Kontrata me “Rapiscan” ishte e pazbatueshme

Drejtore e Përgjithshme e Doganave, Elisa Spiropali, deklaroi se kontrata e koncesionit të skanimit me kompaninë “Rapiscan” nuk ishte e zbatueshme dhe ankesat e biznesit për koston e lartë ishin të mëdha.

“Qeveria ishte në një proces negociatash me kompaninë. Kontrata ishte e pazbatueshme”, deklaroi Spiropali gjatë një takimi me perfaqësues të biznesit në Shkodër.
Përsa i përket arbitrazhit, Spiropali shpjegoi se Avokati i Shtetit është institucioni i cili po merret me procedurat për mbrojtjen e shtetit shqiptar. “Nuk jam unë autoriteti kompetent për të folur për këtë çështje. Çështja po ndiqet nga Avokati i Shtetit, por mund të them se ka një problem shumë të madh me mënyrën si janë dhënë koncesionet dhe kontratat që janë lidhur”, tha Spiropali. Lidhur me procesin e skanimit në dogana, ajo shpjegoi se ky shërbim mund t’i mbetet shtetit.
“Dogana nuk është autoriteti vendimarrës për këtë çështje, por në shumë vende të botës skanimi është një kompentencë shtetërore dhe nuk ka pse t’i jepet një kompanie të huaj që rëndon biznesin”, tha Spiropali.

Marrëveshja koncesionare me këtë kompani është nënshkruar nga ish-ministri i Financave, Ridvan Bode, ne nentor te vitit 2011 dhe ishte parashikuar të zgjaste 15 vjet.
Kompania amerikane “Rapiscan”, e kontraktuar për skanimin e mallrave në doganë, i është drejtuar arbitrazhit ndërkombëtar me pretendimin e prishjes së kontratës në mënyrë të njëanshme nga qeveria shqiptare dhe ka kërkuar dëmshpërblim në shumën 359 milionë dollarë.