TEHERAN – Irani shqyrton vendosjen e tarifave për anijet që kalojnë në Ngushticën e Hormuzit

TEHERAN, 19 mars /ATSH-AA/ – Irani po shqyrton një projektligj që do t’u kërkonte vendeve të paguajnë tarifa për anijet që kalojnë në Ngushticën strategjike të Hormuzit.

Sipas agjencisë gjysmëzyrtare ISNA, një projektligj parashikon vendosjen e tarifave për anijet që përdorin këtë korridor detar jetik, një nga rrugët më të rëndësishme në botë për furnizimet globale me energji.

Një deputet nga Teherani tha se propozimi synon të vendosë pagesa dhe taksa ndaj Iranit nëse ngushtica përdoret si “kalim i sigurt” për transportin detar, energjinë dhe zinxhirët e furnizimit me ushqim. Ai tha se vendet që përfitojnë nga siguria e tranzitit detar përmes ngushticës “duhet t’i paguajnë tarifa dhe taksa Iranit”.

Propozimi vjen ndërsa përshkallëzimi rajonal është intensifikuar që kur Izraeli dhe SHBA-ja nisën ofensivë të përbashkët kundër Iranit më 28 shkurt, duke vrarë deri tani rreth 1.300 persona, përfshirë udhëheqësin suprem të atëhershëm, Ali Khamenei.

Irani është kundërpërgjigjur me sulme me dronë dhe raketa në të gjithë rajonin dhe ka mbyllur në mënyrë efektive Ngushticën e Hormuzit, një rrugë kyçe për transportin e naftës që zakonisht përpunon rreth 20 milionë fuçi në ditë dhe afërsisht 20 për qind të tregtisë globale të gazit natyror të lëngshëm, duke tronditur tregjet globale të energjisë.   /os/