Teknologji “high tech” edhe për letrat higjienike
Parqet në Pekin kanë gjetur një zgjidhje “high tech” për të penguar njerëzit që të shpërdorojnë letrën higjienike.
Një pajisje, në të cilën është instaluar edhe teknologjia e njohjes së fytyrës, regjistron çdo përdorues dhe më pas lëshon një shirit prej rreth 70 centimetrash letre higjienike, për një përdorim të tualetit në parkun “Tempulli i parajsës”.
I njëjti përdorues duhet të presë për 9 minuta, para se të mund të marrë një tjetër rrip letre higjienike.
Vizitorët në tualet thonë se, ata që kanë nevojë urgjente për tualetin mund të mendojnë se kjo e zgjat shumë qëndrimin atje, ndërkohë që të tjerë e përgëzojnë nismën, duke përmendur këtu kursimin, por edhe lehtësinë e marrjes së letrës në mënyrë automatike.
Më herët këtë muaj, mediet kineze raportuan se vizitorët në tualetet e parkut “Tempulli i parajsës” po shpërdoronin sasi të mëdha të letrës higjienike, e disa madje merrnin edhe topa të plotë dhe i fusnin në çanta.
Pastruesi i tualeteve në park thotë se, pajisja e re ka reduktuar sasinë e letrës higjienikë që njerëzit përdornin, e tani makina mbushet me 4 dhe jo me 14 topa në ditë, siç ndodhte më parë.
