Testi i maturës shpërndahet online, ministri Bajrami kërkon ndihmën e Policisë (Foto)
Ka filluar pjesa e dytë e testit të Maturës Shtetërore për 33 mijë maturantë në Kosovë, por sërish janë paraqitur probleme me shpërndarjen e testit në rrjetet sociale. Minsitri i Arsimit, Arsim Bajrami, ka kërkuar ndërhyrjen e policisë për të parandaluar shpërndarjen e testit online.
Edhe në ditën e dytë të afatit të qershorit të Testit të Maturës 2015, ka filluar shpërndarja e testit online.
Informatat fillimisht kanë ardhur në platformën KALLXO.com nga qytetarët të cilët kanë raportuar për këtë gjë dhe nga monitoruesit e KALLXO.com nëpër komuna.
Ministri i Arsimit, Shkencës dhe Teknologjisë, Arsim Bajrami, ka konfirmuar se po bëhen përpjekje nga maturantët për ta keqpërdorur testin e maturës përmes rrjeteve sociale.
Bajrami vizitoi para pak çastesh qendrën e testimit në shkollën “28 Nëntori” në Prishtinë.
Sipas ministrit, ka individë që po tentojnë ta manipulojnë testin përmes rrjeteve sociale.
KALLXO.com raportoi para pak minutash se testi është shpërndarë online, ndërsa ministri Bajrami tha ta ketë kontaktuar personalisht policinë për të kërkuar ndërhyrjen në parandalimin e keqpërdorimeve.
