Tom Doshi për herë të shtatë në prokurori
Deputeti socialist Tom Doshi, i cili ka denoncuar një komplot për eliminimin e tij fizik dhe të deputetit demokrat Mhill Fufi, u paraqit sot për herë të shtatë në Prokurorinë e Krimeve të Rënda.
Doshi pritet të vijojë dëshminë pas fakteve të paraqitura një ditë më parë. Këto prova, sipas tij provojnë pretendimet për skenarin e vrasjes së dy deputetëve.Sorry, there are no polls available at the moment.
Një telefon celular, dhjetëra mesazhe telefonike si dhe disa pamje filmike, janë disa nga provat që Doshi la në tavolinën e punës së prokurorëve. Nëpërmjet këtyre provave, Doshi pretendon të bindë prokurorët, se faktet e denoncuara prej tij qëndrojnë dhe se është deputeti Frroku ai që e ka informuar për komplotin për vrasje si dhe e ka prezantuar me Durim Bamin.
Burime pranë grupit hetimor të Gazetës Shqiptare, thanë se Doshi dorëzoi disa mesazhe telefonike të shkëmbyera me deputetin Frroku, si dhe celularin në të cilin janë të ruajtura mesazhet. Sa u përket pamjeve, ende nuk janë këqyrur nga prokurorët, për të parë se çfarë përmban CD-ja e dorëzuar nga deputeti denoncues. Doshi u shfaq në derën e prokurorisë në orën 13:00 dhe u largua prej andej dy orë e 20 minuta më vonë. Nuk preferoi të fliste për mediat, por ajo çfarë është e sigurt, lidhet me faktin që dosjen e verdhë që mbante në duar e dorëzoi pranë grupit hetimor.
