Trajnimi i nëpunësit civil, rrit kapacitetet e administratës

Procesi i trajnimit të nëpunësve civilë synon të përbëjë një vlerë të shtuar dhe një instrument në rritjen e kapaciteteve të administratës publike.
Një tryezë e rrumbullakët e organizuar sot nga Departamenti i Administratës Publike, me mbështetjen e Ministrisë së Inovacionit, shkëmbeu ide rreth hartimit të programit të trajnimit të detyrueshëm për nivelin e mesëm dhe të lartë drejtues, bazuar në nevojat reale për trajnim të këtij grupi, si dhe vendosjen e bazave për përgatitjen e programit të trajnimit për Trupën e Nivelit Drejtues, që do të zbatohet vitin e ardhshëm.
Ministrja e Inovacionit, Milena Harito foli për rëndësinë e reformës në administratën publike dhe zhvillimin rrënjësor të saj. Trajnimet, sipas saj, duhet të jenë koherente dhe me efikasitet të lartë, dhe duhet të përkthehen në rezultate konkrete të rritjes së cilësisë së shërbimeve publike.
Rekomandimet në këtë tryezë do të përdoren në hartimin e kurrikulës së trajnimit për grupin e nëpunësve civilë të nivelit të mesëm dhe të lartë drejtues.