Tunizi, sulm pranë Parlamentit. 8 turistë viktima e të tjerë pengje, rrethohen dy agresorët

Dy militantë të armatosur kanë sulmuar ndërtesën e Parlamentit të Tunizisë këtë të mërkurë, duke lënë të vrarë të paktën 8 turistë, ndërkohë që disa të tjerë dyshohen të jenë marrë peng në një muze pranë legjislativit.

Forcat e sigurisë kanë bërë të ditur se kanë rrethuar 2 të dyshuarit, lajm që konfirmohet edhe nga një zyrtar i qeverisë tuniziane dhe mediat vendase.

Nga shkëmbimi i të shtënave mesditën e së mërkurës, agjencia shtetërore e lajmeve TAP informon se ka disa viktima. Agresorët dyshohen të kenë edhe pengje të tjerë në Muzeun Bardo, e cila ndan territor të përbashkët me Parlamentin e vendit, siç bën të ditur zëdhënësi i Ministrisë së Brendshme.

Forcat e armatosura të Tunizisë kanë luftuar prej kohësh militantët islamikë që tentojnë të shkaktojnë trazira në vend, pas kryengritjeve të vitit 2011 kundër autokratit Zine El-Abidine Ben Ali.

Disa mijëra tunizianë janë larguar nga vendi, për të luftuar në krah të grupeve xhihadiste në Siri, Irak dhe Libi, ndërsa qeveria është e shqetësuar për rikthimin e tyre në atdhe, se mund të kryejnë sulme terroriste.