Ushtarët sudanezë përdhunojnë 220 femra në Darfur, mes tyre edhe vajza të mitura
Ushtria e Sudanit është vendosur nën akuzë, pasi forcat e armatosura akuzohen për përdhunimin e të paktën 220 grave e vajzave në veri të Darfurit. Në fakt, ngjarja mendohet se ka ndodhur në tetorin e 2013-ës dhe është denoncuar nga organizata “Human Rights Watch”.
Në raportin prej 48 faqesh të “Human Rights Watch”, janë përfshirë dokumente dhe dëshmi që implikojnë ushtarët sudanezë në përdhunimin e qindra femrave në harkun kohor të 36 orëve.
Ushtria e Sudanit ndërmori një operacion tre ditor në Darfur, dhe ushtarët u futën shtëpi më shtëpi duke përdhunuar gratë dhe vajzat, duke u vjedhur sendet me vlerë, e duke arrestuar e vrarë burrat që i kundërshtonin.
Organizata “Human Rights Watch” është informuar nga dy dezertues të ushtrisë, sipas të cilëve, urdhrat për përdhunimin masiv të femrave ishin dhënë nga eprorët e tyre.
Një grua rrëfeu momentet e tmerrit, duke akuzuar ushtarët për përdhunimin e tre vajzave të saj të mitura. “U futën në dhomë dhe pasi na rrahën përdhunuan një nga një të trija vajzat e mia. Pastaj vazhduan edhe me mua.”- u shpreh gruaja.
