Vuçiç betohet si President, opozita e akuzon: E shite Kosovën!

Aleksandër Vuçiç është betuar sot në Kuvend si Presidenti i ri i Serbisë, por anëtarë të grupit parlamentar “Për shpëtimin e Serbisë – Serbia e Re”, Sanda Rashkoviq Iviq dhe Dijana Vukomanoviq hynë në ndërtesën e Kuvendit serb me mbishkrimet “Nuk është presidenti im”.

Në seancën e betimit të presidentit të ri serb, atyre iu bashkuan edhe deputetë tjerë, si Gjorgje Vukadinoviç dhe Lubisha Ristiç.

Përveç mbishkrimeve “Nuk është presidenti im”, deputetët protestues mbanin në duar edhe të tjera, si: “Nuk dua tradhtar për president”, “Marrëveshja e Brukselit është tradhti”, “Hajduti nuk urohet për vjedhje”, “E ke shitur Kosovën”.

Ndaj këtyre protestave, presidenti i ri i Serbisë, Aleksandar Vuçiq, reagoi duka u dërguar një puthje me dorë, shkruajnë mediat serbe.

Pas betimit, Vuçiç ka deklaruar se si President, do ta ruajë Kosovën si “pjesë të Serbisë”. Në këtë post, ish-kryeministri serb do të zëvendësojë Tomisllav Nikoliç.

Vuçiç ka forcuar kontrollin e tij në pushtet dhe ai e konsideron veten reformator në rrugën e Serbisë drejt anëtarësimit në Bashkimin Evropian.