Xhafaj: Reforma në drejtësi, në rrugën e duhur. Raporti i KV, bazë solide

Kryetari i komisionit të ligjeve, Fatmir Xhafaj ka deklaruar këtë të enjte se tashmë klasa politike shqiptare ka bazën e duhur për të çuar në fund punën e nisur për reformën në drejtësi.

Duke iu referuar raportit paraprak të Komisionit të Venecias, Xhafaj ka vlerësuar se asistenca ndërkombëtare ka pasur një rol kyç në këtë proces.

“Vlerësojmë rolin e jashtëzakonshëm të ekspertizës ndërkombëtare në këtë proces të jashtëzakonshëm. Reforma është zhvilluar me anë të një procesi gjithëpërfshirës dhe transparent”, ka thënë Xhafaj, i cili ka përshëndetur qëndrimin e PD pro raportit të Komisionit të Venecias.

“Ky raport duhet të shërbejë si baza solide e reformës në drejtësi. Ne do ta vazhdojmë me angazhim serioz punën që është bërë deri këtu”, ka thënë kreu i komisionit të ligjeve.

Ai e ka mbyllur deklaratën e tij duke uruar mirëseardhjen në atë që e ka quajtur “trenin e reformës”.

“Ky është treni i drejtësisë për qytetarët dhe jo i drejtësisë për politikanët. Të respektohemi dhe të ndëshkohemi si të barabartë përpara ligjit. Kush e pranon këtë udhëtim është i mirëpritur”, është shprehur Xhafaj.

Duke iu përgjigjur interesit të mediave, Xhafaj ka shtuar se protestat e avokatëve dhe gjyqtarëve janë të pavlefshme pasi sipas tij, atyre disa herë u është kërkuar të bëjnë propozimet e tyre, të cilat do t’i paraqiteshin më pas Komisionit të Venecias. “Disa e kundërshtojnë këtë reformë sepse u preken interesat”, ka thënë më tej Xhafaj.