Zhvillohet ceremonia zyrtare e ndërrimit të Komandës së KFOR-it

Në Prishtinë në kampin Film City zhvillohet sot ceremonia zyrtare e ndërrimit të Komandës së Forcës së Kosovës, KFOR, ku detyrën e komandantit e merr Gjeneral Major Francesco Paolo Figliuolo, nga Gjeneral Major Salvatore Farina.
Presidentja e Republikës së Kosovës, Atifete Jahjaga, në 1 shtator, në një pritje për komandantët vlerësoi angazhimin e gjeneralit Farina dhe i uroi mirëseardhjen komandantit të ri të KFOR-it, Gjeneralit Figliuolo.
Ajo tha se forca paqeruajtëse KFOR në vazhdimësi ka luajtur një rol të rëndësishëm për sigurinë në Kosovë dhe për stabilitetin edhe të rajonit të Ballkanit.
Ministri Agim Çeku, në emër të Ministrisë dhe FSK-së i dha gjeneral major Salvatore Farina, medaljen “Shërbim i Shquar”, me motivacion: “Për mbështetjen e jashtëzakonshme gjatë shërbimit si komandant i KFOR-it në Prishtinë. Vizioni strategjik, lidershipi dhe përkushtimi i tij ishin thelbësorë në ndihmën e ofruar Forcës së Sigurisë së Kosovës në zhvillimin e kapaciteteve të saj”.
Para një viti, në 6 shtator, Gjenerali italian Farina mori përgjegjësinë e komandantit të Forcës së NATO-s në Kosovë nga komandanti i deriatëhershëm, Gjeneral Majori gjerman Volker Halbauer, në ceremoninë e ndërrimit të komandës në Shtabin e Përgjithshëm të KFOR-it në Prishtinë.