Zyrtarizohen ministrat e BDI-së. Zaev rizgjidhet në krye të LSDM-së

Bashkimi Demokratik për Integrim zyrtarizoi emrat e ministrave të tij në kabinetin qeveritar, të gjithë kuadro të përgatitur, sipas kreut të partisë Ali Ahmeti.
BDI-ja do të ketë dy zv.kryeministra në qeverinë e Zoran Zaevit, atë për Sistemin Politik dhe Marredhëniet mes Komuniteteve, si dhe zëvendeskryeministrin për Integrimin europian. Kjo parti do të marrë edhe Ministrinë e Drejtësisë, atë të Mjedisit dhe Ministrinë e Ekonomisë.
Megjithatë polemikat nuk kanë munguar dhe disa analistë vendas thonë se, pjesa më e madhe e emrave të propozuar kanë shërbyer në qeveritë e mëparshme me Nikola Gruevskin.

Lëvizja BESA, ka deklaruar se nuk do të jetë pjesë e kabinetit Zaev, ndonëse do ta mbështsë atë në Parlament.  Kurse Ziadin Sela kujtoi edhe njëherë se shqiptarët presin rezultate konkrete nga mbështetja që i dhanë Zaevit, duke nisur me Reformën në Drejtësi. Në Kongresin e 22-të të Partisë Social-Demokrate, Zaev premtoi para 700 delegatëve fundin e ndasive dhe reforma rrënjësore për vendin.

Ai u rizgjodh kryetar i partisë, vend për të cilin ishte edhe kandidati i vetëm. Në fjalimin e mbajtur në Kongres, Zaev theksoi se ka shumë punë përpara qeverisë së re, e nuk do të lejojë të përsëritet e keqja që VMRO-DPMNE-ja i bëri – sipas tij, – shtetit maqedonas.

Emrat e BDI-së

1. Hazbi Lika, zv.kryeministër për Sistemin Politik dhe Marrëdhëniet midis komuniteteve;
2. Bujar Osmani, zëvendëskryeministër për Bashkimin Europian (i Integrimit);
3. Bilen Saliu, ministër i Drejtësisë;
4. Sadulla Duraku, ministër i Ekologjisë;
5. Kreshnik Bekteshi, ministër i Ekonomisë.
6. Ramiz Merko, ministër pa portofol.