OSBE: Marrëdhëniet etnike në Maqedoni, kritike
OSBE vlerëson se marrëdhëniet etnike në Maqedoni janë tejet kritike dhe se do të jenë të tilla dhe në vijim.
Një gjë të tillë e ka thënë Komisionerja e lartë për Komunitetet, Astrid Thors, e cila raportoi në Vjenë, pas vizitave të krerëve politikë në Maqedoni.
“Polarizimi etnik i shoqërisë ishte në qendër të diskutimeve të mia me lidershipin politik në Shkup, gjatë muajit Qershor. Fatkeqësisht, tendencat drejt ndarjes janë duke u konsoliduar më shumë dhe incidentet po marrin një aspekt ndër-etnik. T’i adresosh këto incidente, si thjesht çështje sigurie, nuk mjafton. Edhe pse kjo është më se e qartë për liderët politike, nuk ka një marrëveshje mbi mënyrën se si duhet adresuar kjo çështje. Unë vizitova qeverinë, duke kërkuar që ajo të përdorë mandatin e ri të saj, për të punuar drejt dialogut dhe bashkëpunimit përtej spektrit etno-politik. Kjo është një nga kushtet për ndërtimin e konsensusit politik”, ka raportuar Astrid Thors.
Komisionerja e lartë e BE-së shtoi më tej se dialogu ndër-etnik mund të mundësojë edhe shqyrtim të Marrëveshjes së Ohrit, për të nxjerrë në pah politikat e duhura të së ardhmes.
