I falsifikuan pasaportën skafistit të tragjedisë së 9 janarit 2004, arrestohen 2 efektivë
Dy punonjës policia janë arrestuar nga Prokuroria e Vlorës, për shkak se i nxorën pasaportë biometrike, me gjeneralitete të rreme një personi të shpallur në kërkim ndërkombëtar.
Shërbimit për Çështjet e Brendshme dhe Ankesat, Vlorë, pas një hetimi disa mujor të prokurorisë, arrestoi inspektorin Leonel Begaj, me detyrë pranues për dokumentacionin e personave që aplikojnë për t’u pajisur me pasaporta në Komisariatin e Policisë Vlorë dhe kryeinspektorin Lirim Lamaj, me detyrë ndihmës-specialist, në Komisariatin e Policisë Vlorë.Hetimet nisën nga Prokuroria e Vlorës, për veprën penale të “Shpërdorimit të Detyrës” dhe “Falsifikimit të Dokumenteve”, nga personi që ka për detyrë administrimin dhe ruajtjen e tyre, të kryera në bashkëpunim.
Nga hetimet e kryera dhe aplikimi i metodave speciale te hetimit është dokumentuar se punonjësit e policisë, Leonel Begaj me cilësinë e personit që pranon aplikimet për pajisje me pasaportë biometrike, në bashkëpunim me punonjësin e policisë Lirim Lamaj në cilësinë e punonjësit të policisë që kryen verifikimin e të dhënave të aplikimit, kanë përgatitur praktikën përkatëse për pajisjen me pasaportë biometrike të shtetasit Viron Robaj me gjeneralitetet e shtetasit F. K. Robaj ishte person i shpallur në kërkim ndërkombëtar për veprën penale të “Dhënies ndihmë për kalim të paligjshëm të kufirit me pasojë vdekjen” për arsye se është dënuar nga Gjykata e Apelit Vlorë me vendim të formës prerë me 25 vjet burg, për tragjedinë e datës 9 Janar 2004.
Ky i fundit është arrestuar në Itali, e cila e ka identifikuar me anë të gjurmëve. Atij iu sekuestrua pasaporta me të dhëna të rreme, me gjeneralitetet e shtetasit F.K. Nga ky moment është njoftuar zyra e Interpolit shqiptar dhe kanë nisur hetimet nga SHÇBA, për personat që kanë mundësuar lëshimin e dokumentit të falsifikuar. Hetimet po vazhdojnë në bashkëpunim me Prokurorinë e Rrethit Gjyqësor, Vlorë. Me 9 janar 2004 një gomone u nis nga Vlora drejt Italisë me dhjetëra emigrantë. Si pasojë e avarisë sa mjetit transportues, 21 persona gjetën vdekjen.
