Sejko për FMN: Këshillat e institucionit, vendimtare për konvergjencën e EQLJ
Roli i qeverisjes dhe institucioneve në rritjen e mirëqenies dhe përballimin e situatave të vështira në Europën Qëndrore, Lindore dhe Juglindore ishin në fokus të konferencës së nivelit të lartë të mbajtur në Dubrovnik të Kroacisë.
Guvernatori i Bankës së Shqipërisë Gent Sejko mori pjesë edhe në tryezën e diskutimit, organizuar nga Drejtorja e Përgjithshme e Fondit Monetar Ndërkombëtar, Christine Lagarde. Në fjalën e tij ai vlerësoi kontributin e FMN në vendet e Europës Qëndrore, Lindore dhe Juglindore për realizmin e reformave.
“FMN-ja ka luajtur dhe vazhdon të luajë një rol të rëndësishëm në rajonin e EQLJ-së. Programet dhe këshillat e FMN-së kanë qenë vendimtare në vendosjen e rajonit në rrugën e duhur, nga tranzicioni drejt konvergjencës. Për më tepër, FMN-ja ka vazhduar të luajë rolin e rregullatorit sa herë që vendet e këtij rajoni janë përballur me vështirësi ekonomike dhe financiare”, tha Guvernatori.
Ai ju referua rastit të fundit të marrëveshjes mes Shqipërisë dhe FMN , e cila u konsiderua si një domosdoshmëri dhe zbatimi i saj përfundoi me sukses.
Për sa i përket rolit të FMN-së në të ardhmen, Guvernatori u shpreh se ky rol mund të jetë më fleksibël dhe më efecient, duke kontribuar në forcimin e masave parandaluese të krizave të mundshme dhe në arritjen e objektivave finalë.
Konferenca
Konferenca “Ripërshpejtimi i konvergjencës në Evropën Qendrore, Lindore dhe Juglindore – roli i qeverisjes dhe institucioneve” u organizua nga Banka Kombëtare e Kroacisë dhe Fondi Monetar Ndërkombëtar.
Përveç përfaqësuesve të lartë të FMN, në këtë konferencë merrnin pjesë rreth 30 guvernatorë dhe ministra të financave nga vendet e Evropës Qendrore, Lindore dhe Juglindore , si dhe përfaqësues nga Komisioni Evropian, Banka Evropiane për Rindërtim dhe Zhvillim, Banka Evropiane e Investimeve, dhe nga institucione të tjera financiare dhe bota akademike.
