Kosovë- Kanada, zgjerim bashkëpunimi
Zhvillimi ekonomik është prioritet i qeverisë edhe për vitin 2016, tha sot kryeministri i Republikës së Kosovës, Isa Mustafa, në takim me ambasadorin e Kanadasë në Kroaci, jorezident për Kosovën, Daniel Maksymiuk, ku biseduan për zgjerimin e bashkëpunimit ndërmjet dy shteteve.
Kryeministri Mustafa e njoftoi për progresin në Kosovë gjatë këtij viti dhe rezultatet konkrete të arritura në integrimet evropiane, në zhvillimin ekonomik, mirëqenien sociale, e fusha të tjera.
Po ashtu, Mustafa theksoi se qeveria e Kosovës do të vazhdojë ta ketë prioritet qendror zhvillimin ekonomik, hapjen e vendeve të reja të punës, forcimin e shtetit ligjor, integrimet evropiane si dhe reformat në kuadër të zhvillimit të vendit si dhe çmoi mbështetjen e madhe që Kanadaja ka dhënë për Kosovën në të gjitha fazat, duke shprehur përkushtimin e qeverisë së Kosovës për fuqizimin e mëtejshëm të bashkëpunimit, veçmas në fushën e zhvillimit ekonomik dhe investimeve kanadeze në Kosovë.
Ambasadori i Kanadasë, Daniel Maksymiuk, vlerësoi progresin në Kosovë, duke shprehur përkushtimin e shtetit të tij për thellimin e relacioneve me Kosovën. Ambasadori Maksymiuk, po ashtu, shprehu përkushtimin e Kanadasë për bashkëpunim në zhvillimin ekonomik dhe në mundësitë e investimeve nga bizneset kanadeze në Kosovë.
