Veliaj: Zëvendësojmë të gjitha barakat e romëve me shtëpi

Të gjitha barakat e romëve në Shkozë do të zëvendësohen me shtëpi. Kreu i bashkisë Erion Veliaj ka marrë pjesë sot në panairin e shërbimeve për familjen të organizuar nga Ministria e Mirëqënies Sociale dhe Rinisë, në ditën Kombëtare të familjes.

“Bashkia e Tiranës brenda këtij viti do të shpërndajë pjesën e mbetur të banesave sociale. Javën që vjen ne do të fillojmë me një lagje të re rome në zonën e Shkozës. Do të zëvendësojmë të gjitha barakat me shtëpi që kanë dinjitetin që duhet të ketë secili që ka vendosur të jetojë në Tiranë”, njoftoi Veliaj.

Rikthimi i çekut të bebes, hapja e mencave sociale, shpërndarja e banesave sociale apo dhe mbështetja për komunitetin rom u përmendën nga kryebashkiaku si politikat sociale që po ndiqen nga institucioni i kryeqytetit.

Veliaj u bëri më tej apel donatorëve që t’u ofrojnë ndihmë edhe bashkive në rrethe të ndryshme të provincës ku vështirësitë dhe problemet e shoqërisë janë më të mëdha.