Reforma në drejtësi, Peleshi: Shpresojmë në miratimin më 21 korrik

Zv/kryeministri Niko Peleshi deklaroi të martën se nuk janë humbur shpresat për miratimin e reformës në drejtësi brenda 21 korrikut.

Duke komentuar deklaratën e deputetit socialist, Pandeli Majko për mbajtjen e zgjedhjeve dhe referendumit në të njëjtën ditë, zv/kryeministri tha se Majko, si çdo personalitet politik i përgjegjshëm për një sfidë të shoqërisë shqiptare, është i shqetësuar dhe jep alternativat e veta.

Unë i përkas atyre politikanëve që ende besojnë se politika shqiptare do ti gjejë forcat dhe energjitë’, mbase të fundit, për ti dhënë rrugën e duhur reformës, theksoi zv/kryeministri. Ndaj ne nuk i kemi humbur shpresat dhe mundësitë, nënvizoi ai nga Korça

Çdo deputet, theksoi Peleshi, si pjesë e një formacioni politik apo si pjesë e përgjegjësisë që ka për të mos e shpërdoruar mandatin e marrë nga populli, i ka të gjitha mundësitë që më datën 21 korrik të mbështesë reformën.
Unë akoma nuk arrij ta besoj që një parti politike, siç është PD, do të marrë guximin që të refuzojë reformën. Ne jemi duke u investuar dhe duke u treguar të duruar për një thirrje të ndërgjegjes politike të kësaj partie dhe të deputetëve të saj, deklaroi Peleshi në një prononcim për gazetarët.