Mustafa: Aprovimi i Kushtetutës së Kaçanikut, themel i shtetit të Kosovës

Kryeministri i Republikës së Kosovës, Isa Mustafa, me rastin e 25 vjetorit të Ditës së Kushtetutës së Kosovës e vitit 1990, e njohur si Kushtetuta e Kaçanikut, i ka uruar të gjithë qytetarët për këtë ditë të shënuar në historinë e shtetit të Kosovës.

Kryeministri Isa Mustafa ka theksuar se 7 Shtatori është një prej datave më të rëndësishme në rrugën e popullit të Kosovës drejt lirisë, demokracisë dhe pavarësisë.

Sipas një komunikate të qeverisë, Mustafa po ashtu theksoi se aprovimi i Kushtetutës së Kaçanikut, vendosi themelet e shtetit të pavarur të Kosovës dhe dëshmoi vendosmërinë e pathyeshme të qytetarëve të Kosovës për të realizuar aspiratat e tyre shtetformuese.

Me këtë rast jubilar, kryeministri Isa Mustafa ka përkujtuar dhe shprehu mirënjohjen edhe për deputetët e atëhershëm të Kuvendit të Kosovës, të cilët në rrethana tejet të vështira miratuan Kushtetutën e Kaçanikut.