Kryeministria daneze në Tiranë: Shqipëria është partnere mjaft e vlerësuar për Danimarkën

Kryeministrja e Danimarkës, Mette Frederiksen zhvilloi dje një vizitë zyrtare në Shqipëri, e para e një kryeministri të Danimarkës në vendin tonë. Frederiksen u prit në takim nga Kryeministri Edi Rama, me të cilin zhvilloi edhe një konferencë për shtyp.

“Shqipëria është partnere mjaft e vlerësuar për Danimarkën dhe një aleate shumë e besuar e NATO-s. Në një kohë kur Bashkimi Evropian është më i rëndësishëm se kurrë më parë, unë shpresoj që ne të mund të ndërtojmë një partneritet edhe më të fortë dhe jam shumë e sigurtë që do ta bëjmë një gjë të tillë”, theksoi Frederiksen.

Ndërsa Rama tha se, “Danimarka ka qenë prezente në të gjithë procesin e transformimit të vendit, qoftë përmes agjencisë së saj të ndihmës, por mbi të gjitha politikisht e diplomatikisht si një mbështetëse e vendosur e Shqipërisë dhe Ballkanit Perëndimor në procesin e integrimit europian”.

Kryeministri Rama gjatë takimit me homologen daneze i dhuroi një shall të punuar me dorë, si edhe një çantë me motive të një mozaiku të bukur të Shqipërisë, të cilin e cilësoi, “një edicion shumë të kufizuar për Ju”.

Më pas, Rama dhe Frederiksen vizituan Piramidën, e cila po kthehet në qendrën më të madhe rajonale të novacionit digjital.