Abuzuan me projektin e kamerave në Tiranë, “Arrest shtëpie” për tre ish-zyrtarët e policisë

Gjykata e Tiranës ka vendosur masën e sigurisë “arrest shtëpie” për tre ish-zyrtarë të Drejtorisë së Përgjithshme të Policisë, të cilët u ndaluan me urdhër të Prokurorisë me 13 shkurt 2015, të dyshuar për veprat penale  të “Shpërdorimit të detyrës…” dhe “Falsifikimit të dokumenteve…”, në zhvillimin e procedurave të prokurimit publik për projektin e kamerave dhe instalimin e tyre në Tiranë, në vitin 2010.

Në vijim të hetimeve, në bazë të materialit referues të Shërbimit të Kontrollit të Brendshëm (SHKB), të premten e kaluar, Prokuroria e Tiranës nxori urdhrin e ndalimit për shtetasit K. Kukaj, ish-Shef i Sektorit të Prokurimeve në Drejtorinë e Përgjithshme të Policisë, si edhe dy ish-zyrtarë të tjerë të këtij institucioni; A. Hysko, dhe B. Martini, ish-specialist dhe ish-juriste në sektorin e prokurimeve.

Gjykata argumentoi se  një familjar i afërt i K.Kukajt, vuan nga një  sëmundje që kërkon praninë e tij të vazhdueshme, e për pasojë është lënë në “Arrest shtëpie”. Ish-specialist,  A. Hysko, vuan nga një sëmundje që kërkon kujdesie të vazhdueshme jashtë ambienteve të paraburgimit, e për pasojë gjykata vendosi të njëjtën masë sigurie, ndërsa për juristen B. Martini është prokuroria ajo që kërkoi këtë masë në gjykatë. Me anë të falsifikimit të dokumenteve të tre personat e lartpërmendur dyshohet se kanë përfituar shumën prej 758 mijë dollarë.